Ente sambathennu cholluvaan

എന്റെ സമ്പത്തെന്നു ചൊല്ലുവാൻ വെറെയില്ലൊന്നും

യേശു മാത്രം സമ്പത്താകുന്നു

ചാവിനെ വെന്നുയിർത്തവൻ വാനലോകമതിൽ ചെന്നു

സാധുവെന്നെ ഓർത്തു നിത്യം താതനോടു യാചിക്കുന്നു

 

ക്രൂശിൽ മരിച്ചീശനെൻപേർക്കായ് വീണ്ടെടുത്തെന്നെ

സ്വർഗ്ഗ കനാൻ നാട്ടിലാക്കുവാൻ

പാപം നീങ്ങി ശാപം മാറി മൃത്യുവിന്മേൽ ജയമേകി

വേഗം വരാമെന്നുരച്ചിട്ടാമയം തീർത്താശ നൽകി

 

തന്റെ പേർക്കായ് സർവ്വസമ്പത്തും

യാഗമായ് വച്ചിട്ടെന്നെന്നേക്കും തന്നിൽ പ്രേമമായ്

തന്റെ വേല ചെയ്തുകൊണ്ടും എന്റെ ക്രൂശ് ചുമന്നുകൊണ്ടും

പ്രാണപ്രിയൻ സേവയിലെൻ ആയുസ്സെല്ലാം കഴിച്ചിടും

 

നല്ല ദാസൻ എന്നു ചൊല്ലുന്നാൾ തന്റെ മുമ്പാകെ

ലജ്ജിതനായ് തീർന്നുപോകാതെ

നന്ദിയോടെൻ പ്രിയൻമുമ്പിൽ പ്രേമകണ്ണീർ ചൊരിഞ്ഞിടാൻ

ഭാഗ്യമേറും മഹോത്സവ വാഴ്ചകാലം വരുന്നല്ലോ

 

കുഞ്ഞാടാകും എന്റെ പ്രിയന്റെ സീയോൻ പുരിയിൽ ചെന്നുചേരാൻ ഭാഗ്യമുള്ളതാൽ

ലോകമെന്നെ ത്യജിച്ചാലും ദേഹമെല്ലാം ക്ഷയിച്ചാലും

ക്ലേശമെന്നിൽ ലേശമില്ലാതീശനെ ഞാൻ പിന്തുടരും

 

എന്റെ ദേശം ഇദ്ധരയല്ല അന്യനായ് സാധു

ഹാമിൻദേശം വിട്ടുപോകുന്നു

മേലിന്നെരുശലേമെന്നെ ചേർത്തുകൊൾവാനൊരുങ്ങിത്തൻ

ശോഭയേറും വാതിലുകളെനിക്കായിട്ടുയർത്തുന്നു

 

എന്റെ രാജാവെഴുന്നള്ളുമ്പോൾ തന്റെ മുമ്പാകെ

ശോഭയേറും രാജ്ഞിയായിത്തൻ

മാർവ്വിലെന്നെ ചേർത്തിടും തൻ പൊന്നു മാർവ്വിൽ മുത്തിടും ഞാൻ

ഹാ! എനിക്കീ മഹാഭാഗ്യം ദൈവമേ നീ ഒരുക്കിയേ!