Karthaavilennum ente aasrayam

കർത്താവിലെന്നും എന്റെ ആശ്രയം

കർത്തൃസേവയൊന്നേയെന്റെ ആഗ്രഹം

കഷ്ടമോ നഷ്ടമോ എന്തു വന്നിടിലും

കർത്താവിൻ പാദം ചേർന്നു ചൊല്ലും ഞാൻ

 

ആർത്തുപാടി ഞാൻ ആനന്ദത്തോടെ

കീർത്തനം ചെയ്തെന്നും വാഴ്ത്തുമേശുവെ

ഇത്രനൽ രക്ഷകൻ വേറെയില്ലൂഴിയിൽ

ഹല്ലേലുയ്യാ പാടും ഞാൻ

 

തൻ സ്വന്തജീവൻ തന്ന രക്ഷകൻ

തള്ളുകില്ലയേതു ദുഃഖനാളിലും

തൻതിരു കൈകളാൽ താങ്ങി നടത്തിടും

തൻ സ്നേഹം ചൊൽവാൻ പോരാ വാക്കുകൾ

 

വിശ്വാസത്താൽ ഞാൻ യാത്ര ചെയ്യുമെൻ

വീട്ടിലെത്തുവോളം ക്രൂശിൻ പാതയിൽ

വൻതിരപോലോരോ ക്ലേശങ്ങൾ വന്നാലും

വല്ലഭൻ ചൊല്ലിൽ എല്ലാം മാറിടും

 

എൻ സ്വന്തബന്ധു മിത്രരേവരും

എന്നെ കൈവിട്ടാലും ഖേദമെന്തിനാം?

കൈവിടില്ലെന്ന തൻ വാഗ്ദത്തമുണ്ടതിൽ

ആശ്രയിച്ചെന്നും ആശ്വസിക്കും ഞാൻ

 

വിശ്വാസം കാത്തു ഓട്ടം ഓടിയെൻ

ആയുസ്സെല്ലാം നല്ലപോർ നടത്തും ഞാൻ

പിന്നെയെൻ യേശുവിൻ പാദമണഞ്ഞു ഞാൻ

എന്നാളും സ്തോത്രഗീതം പാടിടും.