Neethimaanmaarin koodaarangalil

നീതിമാന്മാരിൻ കൂടാരങ്ങളിൽ

ജയസംഗീതങ്ങൾ പാടിടുവിൻ

യേശുവിൽ വിശ്വസിച്ചാർത്തിടുവിൻ

ജയസന്തോഷമേ

 

ജയസന്തോഷമേ ജയസന്തോഷമേ

യേശുവിൽ വിശ്വസിച്ചാശ്രയിച്ചാൽ

ജയസന്തോഷമേ

 

വൈരിയിൻ പാശങ്ങൾ ഛേദിക്കുവാൻ

സ്വർഗ്ഗീയ തേജസ്സുപേക്ഷിച്ചു താൻ

മർത്യർക്കുദ്ധാരണം നേടിടിനാൻ

ജയസന്തോഷമേ

 

നിത്യമാം നീതിക്കായ് മരിച്ചു താൻ

മൃത്യുവിൻ ഭീതി സംഹരിച്ചു താൻ

നിത്യസമാധാനം വരുത്തി താൻ

ജയസന്തോഷമേ

 

ന്യായപ്രമാണത്തിൻ ശാപങ്ങളും

ആയതാലുള്ള വിലാപങ്ങളും

പോയഹോ ക്രൂശിന്മേൽ മുഴുവനും

ജയസന്തോഷമേ

 

സൗജന്യദാനങ്ങൾ സമസ്തവും

മോചനം നീതിയും വിശുദ്ധിയും

ക്രൂശിലെ രക്തത്താൽ എല്ലാവനും

ജയസന്തോഷമേ

 

ഖണ്ഡിപ്പാൻ വേദവിരുദ്ധങ്ങളും

വന്ദിപ്പാൻ ആത്മാവിൽ സത്യത്തിലും

സാദ്ധ്യമിപ്പോൾ ഏതു സാധുവിന്നും

ജയസന്തോഷമേ

 

ലോകത്തിൻ മോഹങ്ങൾ അറയ്ക്കുവാൻ

ആകവേ പാപത്തെ വെറുക്കുവാൻ

ശക്തിയും ഭക്തിയും നൽകുന്നു താൻ

ജയസന്തോഷമേ

 

ഭീഷണി വൈരി പ്രയോഗിക്കിലും

ഏഷണി വ്യാജമായ് ചൊല്ലുകിലും

ക്ലേശം അശേഷമില്ലായതിലും

ജയസന്തോഷമേ

 

കൂരിരുൾ മാറി പ്രകാശത്തിനായ്

ദൂരസ്ഥർ നിത്യം സമീപസ്ഥരായ്

സ്വർഗ്ഗങ്ങൾ ഭക്തർ നിവാസങ്ങളായ്

ജയസന്തോഷമേ

 

തേജസ്സിൽ വേഗത്തിൽ വന്നിടും താൻ

വ്യാജമാം പൂജകൾ നീക്കിടുവാൻ

രാജത്വം ആശ്രിതർക്കേകിടും താൻ

ജയസന്തോഷമേ.